د دارالترجمو ژباړونکو د ازموینې لپاره د نوم لیکنې د پيل په اړه د عدلیې وزارت خبرتیا
د افغانستان اسلامي امارت د عدلیې وزارت د قانون جوړونې په عمومي ریاست پورې اړوند د تقنیني سندونو د ژباړې او د رسمي سندونو د تصدیق ریاست له موخو څخه یوه، د رسمي سندونو ژباړونکو ته د جواز صادرول دي؛ پر دې اساس یاد ریاست په پام کې لري ترڅو د هغو اشخاصو لپاره چې د کورنیو او بهرنیو ژبو د ژباړې استعداد لري او غواړي د هېواد له رسمي دارالترجمو څخه په یوې کې فعالیت ترسره کړي، د ژباړې رسمي جواز ورکړي.
په ازموینه کې لاندې اشخاص ګډون کولی شي:
۱- هغه اشخاص چې په اړونده ژبه کې د لېسانس په کچه تاييد شوي تحصیلي سندونه ولري.
۲- هغه اشخاص چې زدهکړې يې بشپړې کړې وي او تراوسه یې ډیپلوم نهوي ترلاسه کړی، کولای شي د لوړو زدهکړو وزارت له تایید وروسته د فراغت د رسمي تصدیق په وړاندې کولو سره په ازموینه کې ګډون وکړي.
۳- هغه اشخاص چې لېسانس زدهکړې یې دوام ولري یا له دولسم ټولګي فارغ وي، د ژباړې په برخه کې د درې کلنې عملي کاري تجربې تصدیق په لرلو سره، کولای شي په ازموینه کې ګډون وکړي.
د منلو شرطونه
۱- د نبوي( صلی الله علیه وسلم) له سیرت سره د غوښتونکي د صورت او سیرت مطابقت.
۲- په ازموینه کې د ګډون د غوښتنلیک د فورمې بشپړول.
۳- د تابعیت د تذکرې رنګه کاپي.
۴- د لوړو زدهکړو وزارت لهخوا د تأیید شوي ډیپلوم او د نمرو د ټرانسکرېپټ(کشف الدرجات) رنګه کاپي.
۵- د بهرنیو ژبو د زدهکړې له مرکزونو څخه په اړونده ژبه کې لږترلږه د یو کال زده کړې د تصدیقلیک رنګه کاپي.
۶- لږترلږه یو کال کاري تجربه.
۷- د اطلاعاتو او فرهنګ وزارت له ثبت شویو دارالترجمو څخه د یوې موافقه.
۸- درې قطعې (۴×۳) عکسونه.
په دې وسیله ټولو مینهوالو ته خبر ورکول کېږي چې د ژباړې د رسمي جواز د صدور د ازموینې لپاره نوم لیکنه، د سلواغي د میاشتې له ۱ نېټې څخه پیل او د ۱۴۰۳ هـ.ش کال د کب د میاشتې تر ۲۰مې نېټې پورې دوام لري.
محترم غوښتونکي کولای شي، د نوملیکنې فورمه د عدلیې وزارت د قانون جوړونې عمومي ریاست اړوند د تقنیني سندونو د ژباړې او د رسمي سندونو د تصدیق له ریاست څخه ترلاسه او تر ډکولو وروسته دې په حضوري ډول یاد ریاست ته وسپاري.
