د حکومت د اطلاعاتو او رسنیو مرکز د عدليې وزارت، او نورو امارتي ادارو او رسنیو ستاینه وکړه
د حکومت د اطلاعاتو او رسنیو مرکز د یو لړ مراسمو په ترڅ کې چې د صفرالمظفر میاشتې په ۲۸ نېټه د شنبې په ورځ د ارګ په چهار چنار ماڼۍ کې د امارتي ادارو او رسنیو د ستایلو په منظور جوړ کړې وو، د عدليې وزارت ستاینه وکړه.
په دغو مراسمو کې چې ملت ته د حساب ورکوونې له پاره د رسنیو او امارتي ادارو د هر اړخېزې همکارۍ او د فعالې ونډې په پار جوړ شوي وو، د اسلامي امارت لوړپوړو چارواکو، د مشرتابه هیئت او د مطبوعاتي ادارو مسوولانو او د خصوصي او دولتي رسنیو استازو ګډون کړی وو.
په یاده غونډه کې د عدليې وزارت په استازیتوب د عدليې وزارت مسلکي معین شیخ عبدالکریم حیدر او د دغه وزارت ویاند مولوي عبدالحمید جهادیار هم ګډون کړی وو او د عدلیې وزارت ستاینلیک یې ترلاسه کړ.
په دغو مراسمو کې ۴۳ وزارتونو او خپلواکه ادارو او یو شمېر رسنیو او خبریالانو ته هم ستاینلیکونه وویشل شول.
په یادو مراسمو کې، ډاکټر ملا عبدالواسع صابر د رییس الوزراء پیغام ولوست او وروسته؛ الحاج ملا عبدالغني برادر د اسلامي امارت د لاسته راوړنو په اړه خبرې وکړې. ملا برادر د هېواد په کچه د شرعي نظام حاکمیت، د داخلي عوایدو څخه د ملي بودجې تأمینول، د افغانيو اسعارو ثبات، پر خپل وخت د معاشونو ورکول، د کاري بهیر چټکتیا، د کار زمینه چمتو کول، تحصیلي او ښوونیزو برخو کې پرمختګ، د نوو پروژو پېل، د داخلي او بهرنیو متشبثینو له پاره د پانګونې زمینه برابرول او د سوالګرو راټولول د اسلامي امارت له لاسته راړونو څخه یاد کړل.
په دیادو مراسمو کې، مولوي عبدالسلام حنفي هم د اسلامي امارت پر لاسته راوړنو رڼا واچوله او د افغانستان ګاونډیانو او ټولو هېوادونو ته یې ډاډ ورکړ چې اسلامي امارت غواړي د متقابل احترام په اساس له ټولې نړۍ سره اړیکې وساتي.
همدا راز نوموړي وویل چې اسلامي امارت د اسلامي امارت د اصولو پر اساس د بیان او رسنیو آزادۍ ته ژمن دی.