د حقوقي مساعدتونو د ریاست اوونیزه ناسته جوړه شوه
د عدليې وزارت د حقوقي مساعدتونو د ریاست اوونیزه ناسته د ۱۴۴۴ هجري قمري کال د رجب المرجب میاشت په ۶ نېټه د شنبې په ورځ د حقوقي مساعدتونو د رییس مولوي حافظ عبدالصمد عمري په مشرۍ ددغه ریاست په مقر کې جوړه شوه.
دغه ناسته چې د کاري چارو د چټکتیا او ددغه ریاست د کارکوونکو د د ننګونو او د ستونزو د حل په منظور جوړه شوې وه، د کلام الله مجید د آیاتونو په تلاوت سره پیل شوه.
دغې ناسته کې، د حقوقي مساعدتونو رییس ددغې ناستې آجنډا چې د حقوقي مساعدتونو د مقررې بیاکتل، د ریاست د کاري کړنلارې جوړول او اداري مدیریت کې موجوده ستونزې پکښې شاملې وې، بیان کړې او د موجودو ستونزو د هوارولو په تړاو يې لازمې لارښوونې وکړې او دغې برخه کې لازم تصمیمونه هم ونیول شول.
دغې ناسته کې، د حقوقي مساعدتونو د مقررې د بیا کتنې په منظور ددغه ریاست له کارکوونکو څخه یو شپږ کسیزه کمېټه توظیف شوه ترڅو د یادې مقررې پر بیا کتنې کار وکړي. دغه راز د یاد ریاست په اداري مدیریت کې د موجودو ستونزو په اړه، پریکړه وشوه چې د نوي اداري مدیر تر معرفي پورې ددغه ریاست دوه تنه کارکوونکي د یاد مدیریت کاري چاري ترسره کړي.
یاده ناسته کې، د حقوقي مساعدتونو رییس لارښوونه وکړه چې د حقوقي مساعدینو له کاري چارو څخه په دوامداره توګه نظارت وشي. نوموړي زیاته کړه هرکله چې ددغه ریاست کارکوونکي خپل کاري برخو کې له ستونزو سره مخ شي، هغه دې له نوموړي سره شریک کړي ترڅو موضوع د وزارت مقام ته وړاندیز شي او دغې برخه کې لازمې لارښوونې واخیستل شي.
د حقوقي مساعدتونو رییس ددغه ریاست کارکوونکو سره ژمنه وکړه چې د ترانسپورټي ستونزو په حل کولو، د اداري مدیر او یو تن اجیر د استخدام او ددغه ریاست د مسلکي کارکوونکو د بستونو د ارتقا په اړه له اړوندو مسوولینو سره خبرې کوي او دغه ستونزه به حل کړي.
