د جوزجان ولایت د ځمکو د غصب د مخنیوي د تخنیکي هیئت ناسته جوړه شوه
د جوزجان ولایت د ځمکو د غصب د مخنیوي د تخنیکي هیئت ناسته د شوال میاشت په ۱۰ نېټه د یکشنبې په ورځ د یاد هیئت د رئیس او غړو په حضور سره جوړه شوه او ځیني موضوعات په کې بررسي شول.
په دغې ناسته کې، دغه هیئت ته د مرکزي کمېسیون لیکوونه او لارښوونې مطالعه او بررسي شول او د هغوی پر عملي کیدلو ټینګار وشو.
دغه راز په یاده ناسته کې، د شام اشرف په پروژه کې د ښاروالۍ د غصب شویو ځمکو په اړه له محکمې څخه استول شوې دوسیه مطالعه او بررسي شوه او پریکړه وشوه چې راتلونکې ورځ یاده ساحه له نږدې څخه بررسي شي او د دغه ولایت ښاروال موظف شو چې د ساحې سندونه او معلومات بشپړ او هیئت ته یې وړاندې کړي.
په یاده ناسته کې موظف شویو ټیمونو پر ۸ کلیو او بېلابېلو ساحو د خپل د اجراآتو راپور وړاندې کړ او مشخصه شوه چې د ترکستان پر ښارګوټي څېړنې او بررسۍ بشپړې شوي او راپور یې تایید شو او ټاکل شوې ده چې ډیر ژر به کمېسیون ته واستول شي. دغه راز د پمپ خانې کلي او د افغانګاز پر تصدۍ ۹۵ سلنه څېړنې بشپړې شوي او راپور به يې ډیر ژر کمېسیون ته واستول شي.
