د تېرې یوې میاشت په ترڅ کې نږدې ۴۷ زره جریبه ځمکه په جوزجان ولایت کې امارتي تثبیت؛ او څه دپاسه ۹۲۴ زره جریبه نوره ځمکه تر بررسۍ لاندې ده
دجوزجان ولایت د تخنیکي هیئت ناسته ددغه هیئت د رییس او غړو په حضور سره جوړه شوه او د یوې میاشتنی راپور مرکزي کمېسیون ته د استولو له پاره پکې ترتیب شو.
ددغه راپور پر بنیاد د تېرې یوې میاشت په ترڅ کې ۴۶۹۶۴.۸۱ جریبه ځمکه ددغه هیئت په واسطه امارتي تثبیت شوه او ۹۲۴۹۰۲.۱۴ جریبه نوره ځمکه ددغه ولایت په بېلابېلو برخو کې ددغه هیئت لخوا تر بررسۍ لاندې ده.
دغه راز په یاده ناسته کې، د مرکزي کمېسیون لیکوونه د یو شمېر اشخاصو د عریضو په اړه چې ادعا لري، د هغوی څړځایوونه غصب شوي تر بررسۍ لاندې ونیول شوو.
یاد هیئت د عارضینو ستونزې په حضورې ډول واوریدلې او ددغه هیئت سکرتریت ته لارښوونه وشوه چې د عارضینو موضوعاتو په اړه لا زیاتې څیړنې وکړي او زیات معلومات راټول کړي.
په همدې حال کې، د تخار ولایت تخنیکي هیئت ددغه ولایت دشت قلعه ولسوالۍ ته ولاړ او په ماوراي کوکچه کې د ملي پراختیا شرکت تر دعوا لاندې ۱۰۰۰۰ جریبه ځمکه بررسي کړه. یاد شوي هیئت له سیمه ییزو مسوولینو او مشرانو سره هم وکتل.
پر دې سربېره، د بغلان ولایت تخنیکي هیئت د بغلان-بلخ مسیر کې د پلخمري خواجه الوان دښتې ته ولاړ او غصب شوې امارتي ځمکې یې په ګوته کړې.
ددغې دښتې ځمکې د یو شمېر خلکو لخوا غصب شوي او کورونه او د چرګانو د روزنې فارمونه پرې جوړ شوي دي. یاد شوي هیئت ددغې ساحې له غصب څخه مخنیوی وکړ او له غاصبینو څخه يې شرعي او قانوني سندونه او مدارک وغوښتل. د کادستر ټیم له غصب شوې ساحې څخه کروکي واخیسته.
