د تېرې یوې میاشتې په اوږدو کې په ۷ ولایتونو کې د څه باندې ۸۰ زره ۲۶۳ جریبه امارتي ځمکې استرداد
د ځمکو له غصب څخه د مخنیوي تخنیکي هیئتونو د ۱۴۴۶ هجري قمري کال د روژې د میاشتې په اوږدو کې په هلمند، لوګر، بامیان، جوزجان، پروان، دایکندي او کندهار ولایتونو کې څه باندې اتیا زره دوه سوه دري شپېته (۸۰۲۶۳) جریبه امارتي ځمکه له بررسۍ او تشخيص څخه وروسته، استرداد کړې او اړوندو ادارو ته یې تسلیم کړې.
د تېرې یوې میاشتې په ترڅ کې تر ټولو زیاته استرداد شوې ځمکه په هلمند ولایت کې موقعیت لري چې څه باندې پنځوس زره نهه سوه نهه اويا (۵۰۹۷۹) جریبه ځمکه پهکې شامله ده.
دغه راز د ځمکو له غصب څخه د مخنیوي تخنیکي هیئتونو د یادې میاشتې په اوږدو کې څه باندې درې سوه څلور دېرش زره یو سلو نهه (۳۳۴۱۰۹) جریبه امارتي ځمکه په ۲۱ ولایتونو کې تشخیص کړې او څه باندې پنځه سوه دوه نوي زره څلور سوه اووه پنځوس (۵۹۲۴۵۷) جریبه نوره ځمکه هم په ۳۰ ولایتونو کې تر بررسۍ لاندې نیولې ده.
د امارتي ځمکو د بررسۍ، تشخيص او استرداد بهیر په ټولو ولایتونو کې دوام لري او د غصب شویو زرګونو جریبو امارتي ځمکو دوسیې، د ځمکو له غصب څخه د مخنیوي کمېسیون او په ولایتونو کې د یاد کمېسیون د تخنیکي هیئتونو تر بررسۍ لاندې دي.
