د بدخشان ولایت د ځمکو د غصب د مخنیوي د تخنیکي هیئت د ناستې جوړیدل
د بدخشان ولایت د ځمکو د غصب د مخنیوي د تخنیکي هیئت ناسته، د ذوالقعدې د میاشتې په ۹ نېټه د دوشنبې په ورځ د دغه هیئت د رئیس او غړو په حضور سره جوړه شوه او د ټولګټو ریاست د ملکیتونو د غصب په اړه د دغه ریاست لیک په کې بررسي شو او پریکړه وشوه چې غاصبین جلب کړل شي.
په دغې ناسته کې، د یو شخص او بتاش کلي د اوسیدونکو پر وړاندې د بل شخص عریضه بررسي شوه او پریکړه وشوه له دې امله چې تر دعوا لاندې ساحه د لعل بدخشان د کرنې څېړنیز فارم اړوند ده، د ادعا پاڼې د هغې له دوسيې سره چې له کمېسیون څخه مسترد شوي یوځای، د نیمګړتیاو له بشپړولو څخه وروسته بیا ځل دغه کمېسیون ته واستول شي.
دغه راز په یاده ناسته کې شیوه دښتې ته د هيئت د تېرې اوونۍ د سفر په اړه هم بحث وشو او د دغه هیئت سکرتریت موظف شو چې د هیئت پریکړه د یو رسمي لیک په ترڅ کې ارغنجخواه، بهارک، شهدا او شغنان ولسوالیو ته واستوي ترڅو مسوولین د څړځایونو د غصب او ویجاړولو مخنیوی وکړي.
یاد شوي هیئت د کادستر یو ټیم هم موظف کړ چې د شیوې دښتې د سروې شویو ساحو کره ارقام تثبیت او مشخص کړي.
