د بادغیس ولایت د تخنیکی هیئت ناسته جوړه شوه
د بادغیس ولایت د ځمکې د غصب د مخنیوي د تخنیکي هیئت ناسته ددغه هیئت د رییس او غړو په حضور سره جوړه شوه او د پکې د ځمکې د غصب د مخنیوي برخه کې یو لړ اقدامات ترسره شوو.
یاد هیئت په دغې ناسته کې د مقر ولسوالۍ اړوند د یو شخص مثنی سندونه بررسي شوو چې یاد شوي سندونو تناقضات درلودل؛ لکه د ځمکې مساحت چې ۵۰۰ جریبه ویل شوی خو حدود يې زرګونه جریبه کیږي. له یاد شخص څخه شرعي او قانوني سندونه وغوښتل شوو.
دغه راز سنګ آتش ولسوالۍ کې له یو بل شخص څخه د هغه په تصرف کې د ۶۰ جریبه ځمکې سندونه وغوښتل شوو. یاد شخص وویل چې هیڅ ډول سند نه لري او اعتراف یې وکړ چې عامه مرعی ځمکه یې په مزروع ځمکه تبدیله کړې او د کمېسیون هر ډول پریکړه به ومني.
د دوو نورو اشخاصو موضوع هم بررسي شوه او پریکړه وشوه چې دره بوم ولسوالۍ ته د عامه ځمکو د پلورلو او پېرودلو د مخنیوي په غرض لیک واستول شي او ورپسې هیئت ساحې ته ولاړ شي او ساحه بررسي کړي. یو شمېر اشخاص هم د هیئت راتلونکې غونډې ته جلب شوو.
دغه راز هیئت د ولایت مقام ته وړاندیز وکړ چې ترڅو د ښاروالۍ، ښارجوړولو، ټولګټو او د ځمکو له ادارو څخه یو ګډ مسلکي هیئت توظیف کړي ترڅو له هیئت سره د حدود، کروکي، متراژ په تعیین او نورو فني چارو کې، له هیئت سره همکاري وکړي.
