د ایران سفیر د عدليې له وزیر سره په کتنه کې: په افغانستان کې له جمهوریت او اساسي قانون څخه ملاتړ کوو
د ا.ا.ج د عدليې وزیر قضاوتپوه فضل احمد معنوي نن سهار په کابل کې د ایران له سفیر ښاغلي بهادر امینیان سره وکتل او د دواړو هېوادونو ترمنځ د عدلي همکاریو او د مجرمانو د استرداد په باره کې خبرې وکړې.
ښاغلي امینیان په دې کتنه کې ښاغلي معنوي ته د عدليې وزارت د سمت او له پارلمان څخه د باور د رای د ترلاسه کولو د مبارکۍ په ترڅ کې وویل چې د ایران د عدليې وزارت د افغانستان د عدليې له وزارت سره د همکارۍ د پیاوړتیا او د تجربو د تبادلې لپاره چمتو دی.
هغه زیاته کړه چې ایران د کابو درې نیمو میلیونو افغان پناه غوښتونکو کوربه دی او کابو ۲۰ زره افغان زندانیان هم د دغه هېواد په زندانونو کې زنداني دي. هغه وویل چې د ایران دولت چمتو دی چې دغه زندانیان افغانستان ته وسپاري او دغه راز د ایران دولت ته په افغانستان کې د ۲۵ ایراني زندانیانو په هکله هم پاملرنه وشي.
د هېواد د عدليې وزیر په مقابل کې له افغان مهاجرینو څخه د ایران له کوربه توب څخه په مننې سره وویل چې هڅه کېږي په ایران کې د افغان مهاجرینو د ستونزې او له هغه هېواد څخه د زندانیانو د لېږدونې لپاره د منطقي حل یوه لاره ولټول شي.
هغه زیاته کړه چې د افغانستان او ایران ترمنځ د مجرمانو د استرداد په برخه کې یو موافقه لیک شتون لري او هڅه کېږي دغه موافقه لیک پیاوړی او تطبیق شي.
د ایران د اسلامي جمهوریت سفیر دغه راز وویل چې د ایران په زندانونو کې د ۲۶۰۰ افغان زندانیانو دوسيې بشپړې او افغانستان ته د لېږدونې لپاره چمتو دي.
بهادر امینیان د افغانستان د سولې د بهیر په باره کې هم وویل چې د ایران دولت په افغانستان کې له جمهوریت او اساسي قانون څخه ملاتړ کوي او هیله لري چې ډیر ژر د سولې بهیر پایلې ته ورسېږي.
هغه دغه راز زیاته کړه چې د هغه هېواد د عدليې وزارت د افغانستان د عدليې وزیر ته بلنه ورکړې ده چې ایران ته په سفر سره د دواړو هېوادونو ترمنځ د همکاریو او د تجربو د تبادلې په باره کې، بحث او خبرې وکړي.
