بادغیس ولایت کې ۹۵۶ جریبه امارتي ځمکه تثبیت او تشخیص شوه
د بادغیس ولایت د ځمکو د غصب د مخنیوي تخنیکي هیئت د شوال میاشت له ۱۲ نېټې څخه تر ۱۵ نېټې پورې د دغه ولایت د آبکمري ولسوالۍ د شرم بند ساحې ته ولاړ او دغه ساحه یې چې د افرادو او اشخاصو لخوا غصب شوې وه، بررسي کړه.
هیئت د برات، فرستان او باغبان قومونو له مشرانو او د یادې ساحې له مالدارانو سره وکتل او د هغوی ترمنځ رامنځ ته شوې شخړې یې حل کړې. دغه راز یاد شوي هیئت د سیني، دایزنګي، مشکواڼې او د تایمي قومونو له مشرانو سره په جلا توګه وکتل او له هغوی څخه یې ژمنه واخیستله چې له دغې ساحې څخه به شخصي استفاه نه کوي.
دغه راز تخنیکي هیئت په رباط دهستان کې یوه قطعه امارتي ځمکه چې مساحت یې ۹۵۶ جریبه ده، تثبیت او تشخیص کړه او د عیدګاه له ساحې څخه چې د شرم بند د عامه څړځای برخه ده لیدنه وکړه.
هیئت له یو بل شخص څخه هم چې د تګاب رباط سیمې د مالکیت ادعایې درلودله شرعي او رسمي سندونه وغوښتل.
