د پکتیا ولایت د عدلیې ریاست او د موټر پلورنځیو اتحادیې ترمنځ د همغږۍ ناسته ترسره شوه
د پکتیا ولایت د عدلیې رئیس، مولوي فاتح الله فاتح د شوال میاشتې په ۱۹مه نېټه، د دوشنبې په ورځ د یاد ولایت د موټر پلورنځیو اتحادیې له مسؤولینو سره د همغږۍ ناسته ترسره کړه.
په دې ناسته کې چې د عدلیې ریاست یو شمېر نورو مسؤولينو هم ګډون کړی وو، د عدلیې رئيس ټینګار وکړ د موټر پلورنځیو مسؤولین باید خپل ټول فعالیتونه د هېواد د نافذه قوانینو او اسلامي شریعت په رڼا کې ترسره کړي. نوموړي همدارنګه وویل چې د معاملاتو ټول قراردادونه باید په رسمي ډول ثبت شي او له هر ډول غیر قانوني معاملاتو څخه باید په کلکه ډډه وشي.
همدارنګه په دې ناسته کې د یادې اتحادیې رئيس هم خبرې وکړې او عدلیې رياست ته یې ډاډ ورکړ چې د یاد ولایت موټر پلورنځي خپل ټول فعالیتونه د قوانينو او اسلامي شریعت په رڼا کې ترسره کوي او په دې برخه کې به له عدلیې ریاست سره پوره همغږي ولري.
