د غزني ولایت د ځمکو له غصب څخه د مخنيوي تخنيکي هيئت د مرکزي کمېسيون له پلاوي سره وکتل
د غزني ولایت د ځمکو له غصب څخه د مخنيوي تخنيکي هيئت د سرحدونو، قومونو او قبایلو وزارت معین او د مرکزي کمېسيون د مؤظف پلاوي له رئیس، مولوي محمد اسماعيل غزنوي او نورو غړو سره د غزني ولایت د مقام په مقر کې یوه ناسته جوړه کړه.
په دې ناسته کې مولوي محمد اسماعيل غزنوي د امارتي غصب شويو ځمکو پر استرداد ټینګار وکړ او ویې ویل چې عامو خلکو او سوداګرو ته د امارتي ځمکو په اجاره ورکولو سره به په خپل هېواد کې ځوانانو ته د کار زمینه برابره شي او هم به نورو هېوادونو ته په قاچاقي او غیر قانوني لارو د تګ مخه ونیول شي.
همدارنګه، د تخنیکي هیئت غړو په دغې ناسته کې د ياد هیئت فعالیتونه او لاسته راوړنې شریکې کړې او د یو شمېر ستونزو یادونه یې وکړه، چې د حل په برخه کې یې د همکارۍ غوښتونکي شول.
مؤظف پلاوي تخنیکي هيئت ته ډاډ ورکړ چې د ستونزو د حل په برخه کې به له دوی سره هر ډول همکاري وکړي.
