د ننګرهار عدلیې رئيس د خیریه بنسټونو لهخوا د مرستو په وېشلو کې پر روڼتیا ټینګار وکړ
![.](/sites/default/files/2024-09/nnkrhar_3.jpg)
د ننګرهار عدلیې رئیس مولوي محمد رئیس محمدي په دغه ولایت کې د فعالو خیریه بنسټونو له یو شمېر مسؤولینو سره په یوې ناسته کې، د خیریه بنسټونو په کارونو کې پر شفافیت او مستحقو کسانو ته د مرستو په رسولو ټینګار وکړ.
دا ناسته د صفرالمظفر د میاشتې په ۲۷ نېټه د شنبې په ورځ د عدلیې ریاست په مقر کې جوړه شوه او د عدلیې رئیس پکښې وویل چې خیریه بنسټونه دې له اصولو او قوانینو سره سم فعالیت وکړي. نوموړي د دغو خیریه بنسټونو له مسؤولینو څخه وغوښتل چې د خپلو فعالیتونو راپور په خپل وخت له عدلیې ریاست سره شریک کړي.
دغه راز نوموړي د خیریه بنسټونو په کارونو کې د روڼتیا په تامینولو، د اسلامي او افغاني ارزښتونو په پام کې نیولو، د مرستو په وېشلو کې د انساني کرامت رعایتولو او د خیریه بنسټونو غیرقانوني فعالیتونو څخه د مخنیوي لپاره پر همکارۍ ټینګار وکړ.
د ننګرهار عدلیې رئیس د خیریه بنسټونو له مسؤولینو څخه وغوښتل چې په یاد ولایت کې د خیریه بنسټونو د اتحادیې بیاځل فعالولو لپاره هم ژر تر ژر پاتې کارونه پای ته ورسوي ترڅو د هغه په چوکاټ کې د دغو خیریه بنسټونو کارونو همغږي او لازیات منسجم شي.
په دې ناسته کې د خیریه بنسټونو مسؤولینو هم خبرې وکړې او ژمنه یې وکړه چې پورته موارد به عملي کړي او له عدلیې ریاست سره به همکار وي. دغه راز هغوی د اتحادیې رامنځته کول مهم وبلل او خپل یو لړ ستونزې یې هم له عدلیې رئیس سره شریکې کړې چې د عدلیې رئیس د هغو د لرې کولو په برخه کې کې ډاډ ورکړ.