لغمان ولایت کې څه دپاسه ۸۱۰۰ جریبه ځمکه امارتي تثبیت شوه
د لغمان ولایت د ځمکو د غصب د مخنیوي تخنیکي هیئت د ذوالحجې د میاشتې په ۳ نېټه د چهارشنبې په ورځ د یاد ولایت قرغه يي ولسوالۍ ته ولاړ او دغې ولسوالۍ کې زرګونه جریبه امارتي ځمکه تثبیت او تشخیص کړه.
دغه هیئت د قرغه يي ولسوالۍ عزیزخان کڅ او لوګرلام ساحو ته ولاړ او د ګدام سنګي په نوم د ارزاقو مدیریت ۷ جریبه او ۱۷ بسوې ځمکه چې ځینو خلکو پرې د مالکیت ادعا درلودله، د کادستر نقشې په پلي کیدلو سره امارتي تثبیت کړه.
په همدې توګه دغه هیئت لوګرلام ساحه کې تثبیت کړه چې د سیند تر غاړې ۸۰۰ جریبه ځمکه د اشخاصو او افرادو له خوا تصرف شوې ده. یاد شوي هیئت د ساحې امارتي توب او یا شخصي توب بررسۍ په تړاو لازمې لارښوونې وکړې.
تخنیکي هیئت د پنج پای سیمې اړوند درګي او میرعالي خیل ساحو ته ولاړ او د دغو ساحو په بررسۍ، ۸۱۵۲.۳۵ جریبه ځمکه امارتي تثبیت کړه. دغه هیئت د یادو ساحو له مشرانو سره ناسته جوړه کړه او پر هغوي ټینګار وکړ چې امارتي میدان کې هیڅوک د نویو تصرفاتو حق نه لري. یاد هیئت د پيربابا ساحې ته هم ولاړ او د هدیرې پر سر يې د ځايي اوسیدونکو شخړه بررسي کړه.
