په ننګرهار کې د معاملاتو لارښوونې ۴ دفترونه وتړل شول
د ننګرهار ولایت د عدليې ریاست په مشرۍ ګډ نظارتي پلاوي، د صفرالمظفر د مياشتې په ۶مه نېټه د سهشنبې په ورځ د دغه ولایت مرکز جلالآباد ښار د اوومې ناحیې په اړوندو سیمو کې د معاملاتو لارښوونې له ۲۰ دفترونو څخه نظارت ترسره کړ.
موظف نظارتي پلاوي د یادو دفترونو د فعالیت جوازونه، د پېر او پلور قانونيتوب، رسمي سټې او یو شمېر نور اړين اسناد بررسي کړل چې په پایله کې یې ۴ دفترونه د یو شمېر غیر قانوني فعاليتونو له امله وتړل شول.
همدارنګه، پلاوي د دغه نظارت په ترڅ کې د نورو دفترونو یو شمېر نيمګړتياوې او ستونزې هم مشخصې کړې او د یادو ستونزو د لرې کولو او د کاري چارو ښه پرمخ وړلو په موخه یې د هغو متصدیانو ته لازمې توصیې وکړې.
د ننګرهار عدلیې رياست په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
