د کابل ښار له درملتونونو څخه راټول شوي یو اندازه تاریخ تېر درمل وسوځول شول
د اسلامي امارت د عدلیې وزارت هغه تاریخ تېر شوي او بېکیفیته درمل چې د عدلیې وزارت، عامې روغتیا وزارت، د استخباراتو عمومي ریاست د استازو او د افغانستان د درملو د خدمتونو اتحادیې د مسؤولینو په ګډون د ګډې کمېټې له خوا په کابل ښار کې له درملتونونو څخه راټول شوي وو، وسوځول.
یادې کمېټې د تېرو دوو میاشتو په اوږدو کې په کابل ښار کې له روغتونونو، درملتونونو او د درملو جوړولو شرکتونو څخه نظارت کړی و، چې په پایله کې یې مشخصه شوه چې یو شمېر روغتونونه ناروغانو ته بې مورده نسخې ورکوي او درمل پر ناروغانو په لوړه بیه پلوري.
کمېټې د خصوصي روغتونونو، درملتونونو او د درملو د شرکتونو مسؤولینو ته جدي توصیه وکړه، چې د اسلامي امارت له اصولو او پالیسۍ سره سم فعالیت ترسره کړي، له دې پرته به عدلي او قضايي ارګانونو ته وروپېژندل شي.
د عدلیې وزارت اتحادیو ته د جوازونو د وېش او د هغوی د فعالیتونو د نظارت مسؤولیت پر غاړه لري. له دې امله چې د افغانستان د درملو د خدمتونو اتحادیه په عدلیې وزارت کې ثبت ده او د دغې اتحادیې له مهمو مسؤولیتونو څخه یو هم د بې کیفیته درملو د پلور مخنیوی دی، عدلیې وزارت د عامې روغتیا وزارت او د یادې اتحادیې په همغږۍ دا نظارت ترسره کړ.
