په هرات ولایت کې د معاملاتو لارښوونې له ۳۱ دفترونو څخه نظارت ترسره شو
د هرات ولایت د عدلیې رياست نظارتي پلاوي د رجب المرجب د مياشتې په ۱۰مه نېټه د چهارشنبې په ورځ د هرات ښار په پنځلسمه ناحيه کې د معاملاتو لارښوونې له ۳۱ دفترونو څخه نظارت ترسره کړ او د هغو فعاليتونه یې بررسي کړل.
نظارتي پلاوي په دې نظارت کې د یادو دفترونو رسمي سټې، د فعاليت جوازونه، د پیر او پلور قانونيتوب او یو شمېر نور اړين سندونه بررسي کړل.
همدارنګه نظارتي پلاوي د یادو دفترونو په چارو کې یو شمېر نيمګړتياوې مشخصې کړې چې د لرې کولو په موخه یې د دفترونو متصدياتو ته لازمې توصیې وکړې.
د هرات ولایت د عدلیې رياست په دوامداره توګه په یاد ولایت کې له اړوندو برخو څخه نظارت ترسره کوي ترڅو له غير قانوني فعالیتونو څخه مخنيوی وشي.
