د عدلیې وزارت د مدرسة العدالة د حدیثو له لويې دورې څخه د ۱۲تنو فراغت
د عدلیې وزارت د مدرسة العدالة د حدیثو د لويې دورې د فاضلانو د دستاربندي او فراغت مراسم د رجب المرجب د میاشتې په ۱۶مه نېټه د سهشنبې په ورځ د یادو فاضلانو او د عدليې وزارت د مقاماتو او مسؤولینو په ګډون ترسره شول.
په دغو مراسمو کې د عدلیې وزارت مسلکي معین، محترم شیخ الحدیث مولوي عبدالکریم حیدر، د امارت د قضایاوو عمومي رئیس، محترم مولوي احسان الله وثیق، مالي او اداري رئيس، محترم شیخ الحدیث مولوي سید حبیب الحبیب، د دعوت او ارشاد رئیس، محترم مولوي سعیدالرحمن سعید او د عدلیې وزارت نورو رئیسانو او مسؤولینو ګډون درلود.
په یادو مراسمو کې د عدلیې وزارت د امارت د قضایاوو عمومي رئیس، محترم مولوي احسان الله وثیق د علم پر فضیلت، په حکومتدارۍ کې د هغه پر اهمیت او د علم پر دنیوي او اخروي ګټو خبرې وکړې. نوموړي وویل چې د قرآن کریم د مبارکو آیتونو له مخې، هغه څوک چې علم لري او د شریعت پر اوامرو او نواهیو پوهېږي، له هغه چا سره چې علم نه لري هېڅکله برابر نه دی. همداراز هغه حکومتداري یو لوی امانت وباله او زیاته یې کړه چې د حکومت د چارو پرمخ وړلو لپاره په ځانګړي ډول په هغو برخو کې چې د «حقالعبد» موضوعات مطرح دي، د علماوو جدي اړتیا احساس کېږي.
د عدلیې وزارت د مالي او اداري چارو رئیس، محترم شیخ الحدیث مولوي سید حبیب الحبیب هم یادو مراسمو ته په خپله وینا کې له فراغت څخه وروسته د فاضلانو مسؤولیتونو ته اشاره وکړه او ویې ویل چې د فاضلانو اساسي موخه دې دا وي چې د علم حیثیت وساتي تر څو د هغوی په ظاهر او باطن کې یې اغېزه څرګنده شي او د وخت له ضایع کېدو څخه هم مخنیوی وکړي.
په یادو مراسمو کې د عدلیې وزارت مسلکي معین، محترم شیخ الحدیث مولوي عبدالکریم حیدر د صحیح البخاري کتاب په اړه معلومات وړاندې کړل او د بخاري شریف ختم یې ترسره کړ.
د حدیث شریف په دې دوره کې چې د عدليې وزارت د دعوت او ارشاد رياست له لورې ترسره شوې وه او ۹ مياشتې يې دوام وکړ، ۱۲ تنو ګډون درلود چې د نن ورځې په مراسمو کې یې پر سرونو د فضیلت دستارونه کېښودل شول.
