د عدلیې وزارت د حقوقي مرستو ریاست او د کندوز ولایت د مرستيال والي ترمنځ د همغږۍ ناسته جوړیدل
د عدلیې وزارت د حقوقي مرستو رئيس مولوي جان محمد «محمد طلحه» او ورسره مل پلاوي، د جمادیالثانی د مياشتې په ۳۰مه نېټه د یکشنبې په ورځ د کندوز مرستیال والي مولوي حبیب الرحمن سهيب، د استيناف محکمې رئیس مولانا محمد یوسف ابوالوفا او د نظامي محمکې رئیس شيخ عبدالهادی همت سره د همغږۍ ناسته جوړه کړه.
په دې ناسته کې چې د کندوز ولایت په مقام کې ترسره شوه، په ترڅ کې یې د عدلیې وزارت د حقوقي مرستو رئيس د وړيا حقوقي مرستو او مشورو د وړاندې کولو څرنګوالي، په جزایي قضيو کې حقوقي مرستو ته د بېوزلو زیانمنو، تورنو او شکمنو د لاسرسۍ، د مرکز او ولایتونو په کچه په وړيا ډول د ۱۸۸ شمېرې له لارې حقوقي مشورې ورکول، په عدلي او قضائي مراجعو کې د حقوقي مساعدینو د کاري ستونزو او یو شمېر نورو موضوعاتو په اړه خبرې وکړې او مسؤولينو سره یې لازم معلومات شریک کړل.
د کندوز مرستیال والي په دې ناسته کې وویل، چې ټولې امارتي ادارې باید په خپلو کاري چارو کې له یوبل سره همکاري او همغږي ولري ترڅو د خلکو ستونزې ژر تر ژره حل شي. همداراز نوموړي له مسؤولینو څخه وغوښتل چې د کندوز ولایت د عدلیې ریاست د حقوقي مرستو له آمریت سره هر اړخیزه همکاري وکړي.
همدارنګه په دې ناسته کې نورو مسؤولينو هم ډاد ورکړ چې د حقوقي مرستو د ترلاسه کولو په موخه د عدلیې رياست د حقوقي مرستو آمریت ته د بيوزلو زیانمنو، تورنو او شکمنو کسانو ورپېژندلو او حقوقي مساعدینو سره په قضايي ناستو کې د ګډون او دغه راز د هغوی د مؤکلينو په دوسیو کې لازمه همکاري کوي.
