په ننګرهار ولایت کې له یو شمېر موټر پلورنځيو څخه نظارت ترسره شو
د ننګرهار ولایت د عدلیې رياست نظارتي پلاوي د جمادیالآخرة د مياشتې په ۴ مه نېټه د سهشنبې په ورځ، د دغه ولایت په بټي کوټ ولسوالۍ کې له ۱۵ موټر پلورنځيو څخه نظارت ترسره کړ او د هغو فعالیتونه یې بررسي کړل.
نظارتي پلاوي د دغه نظارت په ترڅ کې د یادو موټر پلورنځیو د ثبت کتابونه، جوازلیکونه، رسميسټې، لوحې او نور اړين سندونه بررسي کړل.
پلاوي د ياد نظارت په ترڅ کې د ۱ موټر پلورنځی د غير قانوني فعاليت له امله وتړه او د پاتې نورو موټر پلورنځیو متصديانو ته یې د موجودو نيمګړتياوو د لرې کولو او د کاري چارو ښه پر مخ وړلو په موخه لازمې توصيې وکړې.
همدارنګه، د دغه نظارت په ترڅ کې د یادو موټر پلورنځیو متصديانو هم خپلې موجودې ستونزې له نظارتي پلاوي سره شريکې کړې او د حل غوښتونکي شول چې د حل په برخه کې ډاډ ورکړل شو.
