د پکتیا عدلیې رياست او د مدافع وکیلانو ترمنځ د همغږۍ ناسته ترسره شوه
د پکتيا ولایت د عدلیې رياست، د ربیعالآخر د مياشتې په ۲مه نېټه د پنجشنبې په ورځ د پکتیا ولایت له یو شمېر مدافع وکیلانو سره د عدلیې ریاست په مقر کې د همغږۍ ناسته ترسره کړه.
د عدلیې رئیس په دې ناسته کې د مدافع وکیلانو د فعالیتونو په اړه هر اړخیز معلومات وړاندې کړل او ټینګار یې وکړ چې مدافع وکیلان دې خپل فعالیتونه د مدافع وکیلانو د انسجام له طرزالعمل سره سم تنظیم کړي.
همداراز نوموړي زیاته کړه چې مدافع وکیلان دې د دارالوکالې رسمي مهرونه یوازې په رسمي سندونو او تحریراتو کې وکاروي.
د پکتیا ولایت د عدلیې رئیس له مدافع وکيلانو څخه غوښتنه وکړه چې د خپلو مؤکلینو له حقوقو څخه په مسلکي، اغیزمن او قانوني ډول دفاع وکړي او له هر ډول غیر قانوني او غیر مسلکي چلند څخه ځان وساتي.
په یاده ناسته کې مدافع وکیلانو هم له مسؤولینو سره خپلې ستونزې، وړاندیزونه او نظرونه شریک کړل چې د عدلیې ریاست مسئولینو یې د حل په موخه ډاډ ورکړ.
