په نیمروز ولایت کې د کورونو د کرایې د کنټرول ګډه کمېټه جوړه شوه
په نیمروز ولایت کې د کورونو د کرایې د کنټرول لپاره ګډه کمېټه د ربیع الاول د مياشتې په ۳۰مه نېټه د سهشنبې په ورځ د عدلیې رئیس مولوي عبدالوارث خلیل په مشرۍ او د نورو امارتي ادارو د استازو په عضویت جوړه شوه.
په دې کمېټه کې د ښاروالۍ، استخباراتو، امنیې قوماندانۍ او د حکمونو او فرمانونو د تعقيب او نظارت، د کور او ښار جوړولو، د کرنې، اوبو لګولو او مالدارۍ رياستونو استازي عضویت لري.
یادې کمېټې په خپلې لومړنۍ ناسته کې د کورونو د کرایو د زیاتوالي او د هغو د کنټرول څرنګوالي په اړه بحث وکړ. په دې ناسته کې پرېکړه وشوه چې په نیمروز ولایت کې د کور د کرایې له زیاتوالي څخه د خلکو شکایتونه دې د عدلیې ریاست لخوا ترلاسه او په کمېټه کې دې ورته رسیدګي وشي.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
