په کندز ولایت کې د معاملاتو لارښوونې له ۲۰ دفترونو څخه نظارت ترسره شو
د کورونو د کرایې د کنټرول ګډې کمېټې ټيمونو په کندز ولایت کې د کورونو د کرایې د کنټرول په موخه، د ربیعالاول د مياشتې په ۲۳مه نېټه د سهشنبې په ورځ د کندز ښار اړوند په پنځمې او اتمې ناحیو کې د معاملاتو لارښوونې له ۲۰ دفترونو څخه نظارت ترسره کړ.
د دغه نظارت پر مهال د یادو دفترونو د معاملاتو څرنګوالی او رسمي سټې بررسي شوې چې په ترڅ کې یې ۳ دفترونه د غير قانوني فعاليت له امله وتړل شول.
نظارتي کمېټې د پاتې نورو دفترونو متصديانو ته توصیه وکړه چې له هغو معاملاتو ډډه وکړي چې د کورونو د کرایې د لوړېدو لامل ګرځي، له مخکې پیسو اخیستلو څخه هم ځان وساتي او همدارنګه ټینګار یې وکړ چې له بیوزله خلکو سره مرستې او همکارۍ ترسره شي.
د کورونو د کرایې د کنټرول ګډه کمېټه په مرکز کې د عدلیې وزارت په مشرۍ او په ولایتونو کې د عدلیې ریاستونو په مشرۍ په جدي ډول د کورونو د کرایې له قراردادونو څخه نظارت ترسره کوي او د کرایې د زیاتوالي یا د غیر رسمي قرارداد د مشاهدې په صورت کې به له سرغړونکو اشخاصو سره جدي چلند وکړي.
د کورونو د کرایې د کنټرول د ولایتي ګډې کمیټې په ترکیب کې د عدلیې، استخباراتو، کور او ښار جوړولو، امر بالمعروف او نهی عن المنکر ، د ښاروالۍ ریاستونو او د معاملاتو لارښوونې د اتحادیې استازي شامل دي.
