د عدلیې وزیر په کابل کې د امارتي غصب شویو ځمکو د تثبیت بهیر پر چټکتیا ټینګار وکړ
د اسلامي امارت د عدليې وزیر، د ځمکو له غصب څخه د مخنیوي کمېسیون رئیس او د اراضۍ او د امارتي ځمکو د استرداد وزارت وارسي کوونکی محترم شیخ الحدیث مولوي عبدالحکیم شرعي د کابل ولایت د ځمکو له غصب څخه د مخنیوي تخنیکي هیئت سره په لیدنه کې په کابل کې د غصب شويو ځمکو د تثبیت او تشخیص بهیر پر چټکتیا ټینګار وکړ.
یاده لیدنه د ذیالحجې په ۱ نېټه د پنجشنبې په ورځ د عدليې وزارت په مقر کې ترسره شوه او د امارت د قضایاوو عمومي رئیس او د کمېسیون سکرتر محترم مولوي احسان الله وثیق، د کابل د تخنیکي هیئت رئیس محترم مولوي جانمحمد حمزه، د دغه هیئت غړو او د کابل ولایت مقام استازي پهکې ګډون درلود.
د اسلامي امارت د عدليې وزیر په خپلو خبرو کې وویل چې د ځمکو د غصب اړوند موضوعات په کابل کې زیات دي او له همدې امله زیات کار ته اړتیا لري. نوموړي ټینګار وکړ چې چارې باید په چټکۍ سره پر مخ ولاړې شي او له موجودو امکاناتو څخه اغېزمنه ګټه پورته شي.
هغه همداراز توصیه وکړه چې ټول مسؤولین باید مسؤولیت پېژندونکي وي، په خپلو چارو کې اخلاص او صداقت ولري او یوازې د الله تعالی د رضا لپاره کار وکړي.
له بلې خوا، د کابل ولایت د ځمکو له غصب څخه د مخنیوي تخنیکي هیئت رئیس هم په دې ناسته کې وویل چې هڅه کوي سپارل شوي مسؤولیتونه په ښه توګه تر سره کړي او ډاډ یې ورکړ چې د هیئت کاري چارې به چټکې شي.
