په کابل ښار کې دوه دارالوکالې د غیرقانوني فعالیت له امله وتړل شوې
د عدلیې وزارت د مدافع وکیلانو ریاست نظارتي پلاوي د ذیالقعدې میاشتې په ۲۰مه نېټه، د یکشنبې په ورځ، د کابل ښار د درېیمې ناحیې اړوند له یو شمېر دارالوکالو څخه نظارت وکړ او د هغوی فعالیتونه یې بررسي کړل.
په دې نظارت کې د دارالوکالو د فعالیت جوازونه، د ثبت کتابونه، لوحې، مهرونه، په دارالوکالو کې د وکیلانو حضور او یو شمېر نورو اړینو مواردو څخه نظارت وشو چې په ترڅ کې یې دوه دارالوکالې د غیرقانوني فعالیت له امله وتړل شوې.
همداراز، پلاوي د یادو دارالوکالو ځینې موجودې ستونزې او نیمګړتیاوې مشخصې کړې او د ستونزو او نیمګړتیاو د حل په موخه یې د هغو مسؤولینو ته لازمې توصيې وړاندې کړې.
عدلیې وزارت په دوامداره توګه له اړوندو برخو څخه نظارت کوي، ترڅو د غیرقانوني فعالیتونو مخنیوی وشي.
