د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر، د کمېسیون رئیس او د اراضۍ او د امارتي ځمکو د استرداد وزارت وارسي کوونکی محترم شیخ الحدیث مولوي عبدالحکیم شرعي په مشرۍ په یوې ناسته کې د هېواد په څو ولایتونو کې د زرګونو جریبو ځمکو موضوعات تر بحث او بررسۍ لاندې ونیولې او په هکله یې لازم تصامیم ونیول.
په دې ناسته کې چې د ذوالقعدې د میاشتې په ۱۵مه نېټه د سهشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي حمدالله نعماني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو ادارې عمومي رئیس محترم شیخ الحدیث مولوي نورالحق انور، د سترې محکمې استازي محترم شیخ عبدالصمد حقاني، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون رهبرۍ په بلخ او جوزجان ولایتونو کې د څړځای د سلګونو زرو جریبو موضوع، په کابل ښار کې د سعادت ښارګوټي موضوع او د نورو ولایتونو اړوند ځینې نور موضوعات تر بحث او بررسۍ لاندې ونیول.
په یاده ناسته کې پرېکړه وشوه چې د بېلابېلو ولایتونو مېشتو کوچیانو لپاره، ځانګړې ساحې په پام کې ونیول شي او د عالیقدر امیرالمؤمنین حفظه الله تعالی دفتر ته وړاندیز وشي ترڅو امارتي ځمکې تخلیه او د هغو اړوندو ادارو ته وسپارل شي.
په دې ناسته کې د بلخ او جوزجان ولایتونو د څړځایونو د تثبیت په موخه د توظیف شوي پلاوي راپور وړاندې شو چې له مخې یې په دغو ولایتونو کې د څړځای سلګونه جریبه ځمکه تثبیت شوې ده. کمېسیون پرېکړه وکړه چې هیئت دې خپل کار ته دوام ورکړي او د بادغیس ولایت څړځایونه دې هم بررسي کړي.
د کمېسیون رهبرۍ د ځینو نورو موضوعاتو په اړه هم بحث وکړ او په هکله یې لازمې تصامیم ونیول.
