په پروان ولایت کې څه باندې ۱۴ زره جریبه امارتي ځمکه استرداد شوې ده
د پروان ولایت د ځمکو له غصب څخه د مخنیوي تخنیکي هیئت د رجب المرجب د میاشتې په ۱۲ مه نېټه، د دوشنبې په ورځ د یاد ولایت له والي مولوي محمد ادریس انوري سره د همغږۍ ناسته جوړه کړه.
په دې ناسته کې د پروان ولایت د ځمکو له غصب څخه د مخنیوي تخنیکي هیئت رئیس، مولوي روح الله روحاني د ولایت له مقام سره د دغه هیئت د لاسته راوړنو او فعالیتونو راپور شریک کړ.
نوموړي وویل چې د یاد هیئت د فعالیت له پیل راهیسې څوارلس زره نوي (۱۴۰۹۰) جریبه امارتي ځمکې له بررسۍ او تثبیت څخه وروسته او د مرکزي کمېسیون د پرېکړې او یا د امارتي توب پر مبنا یې د متصرفانو د اعتراف په اساس استرداد او اړوندو ادارو ته تسلیم شوي دي. د هغه په وینا، کابو اته زره (۸۰۰۰) جریبه نورې ځمکې بیا د هيئت تر بررسۍ لاندې دي.
په ورته مهال، د پروان والي مولوي محمد ادریس انوري د هیئت لاسته راوړنې وستایلې او یاد هیئت ته یې د لا زیاتې همکارۍ او مرستې ډاډ ورکړ.
