د اسلامي امارت د عدلیې وزیر له یو شمېر سیاسي شنونکو سره وکتل
د افغانستان اسلامي امارت د عدلیې وزیر، محترم شیخ الحدیث مولوي عبدالحکیم شرعي د هېواد د سیاسي مسایلو له یو شمېر شنونکو سره وکتل او د بېلابېلو موضوعاتو په اړه یې له هغوی سره خبرې وکړې.
په دې کتنه کې چې نن د پنجشنبې په ورځ، د رجب المرجب د میاشتې په ۸ نېټه د عدلیې وزارت په مقر کې ترسره شوه، د عدلیې وزیر د نظام د پېاوړتیا په موخه د خلکو او مسؤولینو پر هڅو ټینګار وکړ او په دې هکله یې د سیاسي مسایلو د شنونکو او کارپوهانو رول مهم وباله.
په دې کتنه کې د هېواد سیاسي شنونکو په بېلابېلو برخو کې د اسلامي امارت کړنې وستایلې او زیاته یې کړه چې له نظام سره به همکار واوسي. دغه راز هغوی د ځمکو له غصب څخه مخنیوی اړین وباله او په دې هکله یې د ځمکو له غصب څخه د مخنیوي کمېسیون د فعالیتونو قدرداني وکړه.
په دې کتنه کې سیاسي کارپوهانو او شنونکو د تقنیني سندونو د مراحلو تېرولو په تړاو هم معلومات وغوښتل او د عدلیې وزیر په دې اړه هغوی ته لازم معلومات وړاندې کړل.
