د عدلیې وزارت مسلکي معين د بدخشان والی سره ولیدل
د افغانستان اسلامي امارت د عدلیې وزارت د مسلکي معين، شيخ الحدیث مولوي عبدالکريم حيدر په مشرۍ د یاد وزارت پلاوي د سفرونو په لړ کې، د ربیعالاول د میاشتې په ۸ مه نېټه د چهارشنبې په ورځ بدخشان ولایت ته سفر وکړ.
دغه پلاوي د بدخشان له والي، مولوي محمد ایوب سره وکتل او د عدلیې ریاست سره یې د ولایت د مقام او نورو سيمه ییزو ادارو پر همکارۍ ټینګار وکړ.
همدارنګه، په دې سفر کې مسلکي معين، د بدخشان ولایت د عدلیې له ریاست څخه هم ليدنه وکړه.
نوموړي د یاد رياست د کارمندانو د فعاليتونو د څرنګوالي له نږدې څارنه وکړه او هغوی ته د کارونو د ښه پرمخ وړولو په موخه لازمې توصیې او لارښوونې وکړې.
په ورته مهال، د عدلیې وزارت مسلکي معين د بدخشان ولایت له یو شمېر مدافع وکيلانو سره هم ناسته جوړه کړه او د هغوی ستونزې واورېدلې او د حل په موخه يې هغوی ته ډاډ ورکړ.
د عدلیې وزارت پلاوی په پام کې لري چې د عدلیې ریاستونو د فعالیتونو د بررسۍ او د یادو ریاستونو له لارې خلکو ته د خدمتونو د وړاندې کولو د پیاوړتیا په موخه د هېواد نورو ولایتونو ته هم سفر وکړي. له دې وړاندې یاد پلاوی بغلان، تخار او سمنګان ولایتونو ته تللی وو او خلکو ته د یاد ولایت د عدلیې ریاستونو د خدمتونو وړاندې کولو څرنګوالی بررسي کړی وو.
