د ارزګان ولایت د ځمکو له غصب څخه د مخنیوي تخنیکي هیئت د یاد ولایت د والي له مرستیال سره وکتل
د ارزګان ولایت د ځمکو له غصب څخه د مخنیوي تخنیکي هیئت د صفرالمظفر د میاشتې په ۲۹ نېټه د دوشنبې په ورځ د د یاد ولایت د والي له مرستیال ملا باري ګل طالب سره وکتل.
په دې کتنه کې چې د ارزګان د ولایت په مقام کې ترسره شوه، په دې ولایت کې د ځمکو د غصب اړوند یو شمېر موضوعات بحث او بررسۍ لاندې ونیول شوو او د والي مرستیال تخنیکي هیئت ته لازمې مشورې او لارښوونې وکړې. دغه راز نوموړي ډاډ ورکړ چې د ولایت مقام له تخنیکي هیئت سره هر اړخیزې همکارۍ کوي.
دغه راز تخنیکي هیئت د ارزګان ولایت د استیناف محکمې له ریاست سره هم یوه ناسته جوړه کړه او د ځمکو اړوند یو شمېر دوسیو او موضوعاتو په تړاو یې پکښې خبرې وکړې او له یاد ریاست څخه یې د همکارۍ غوښتنه وکړه.
یاد هیئت په همدې ورځ خپله نوبتي ناسته هم جوړه کړه او د ځمکو د غصب اړوند دوسیې په کې بررسۍ لاندې ونیول شوې. په دې ناسته کې پرېکړه وشوه چې هیئت د ترینکوټ ښار اړوند ناقل او ګرمآب کلیو ته ولاړ شي او په دغو دوو کلیو کې تر دعوا لاندې ساحې له نږدې بررسي کړي او په هغو کې له تصرفاتو څخه مخنیوی وکړي.
