د عدلیې وزارت مسلکي معین د ناروې د کډوالو شورا له یو پلاوي سره د همکاریو د پیاوړتیا په اړه خبرې وکړې
د اسلامي امارت د عدلیې وزارت مسلکي معین، شیخ الحدیث مولوي عبدالکریم حیدر د صفرالمظفر د میاشتې په ۱۶ نېټه د سه شنبې په ورځ د ناروې د کډوالو شورا د افغانستان څانګې له مسئولینو ښاغلي روبرت انزیکوا او نیل تورنر سره وکتل او له عدلیې وزارت سره د یادې شورا د همکاریو د پیاوړتیا په اړه یې له هغوی سره خبرې وکړې.
په دې کتنه کې د عدلیې وزارت مسلکي معین د ناروې د کډوالو له شورا سره هېوادوالو ته د حقوقي مرستو وړاندې کولو په برخه کې د یاد وزارت هوکړه لیک ته په اشارې سره وویل چې اسلامي امارت په افغانستان کې له ټولو فعالو موسسو سره همکار دی او له هغوی سره د لاسلیک شوي هوکړه لیک تطبیق ته ژمن دی.
نوموړي د ناروې د کډوالو شورا له هیئت څخه وغوښتل چې په خپلو ژمنو عمل وکړي او له هوکړه لیک سره سم له عدلیې وزارت سره همکاري وکړي.
له بل لوري د ناروې د کډوالو شورا مسئولینو هم وویل چې دا شورا چمتو ده له مخکني هوکړه لیک سره سم د عدلیې وزارت حقوقي مساعدینو لپاره د سیمینارونو جوړولو په برخه کې له دغه وزارت سره خپلو همکاریو ته دوام ورکړي.
د یادونې وړه ده چې د اسلامي امارت، عدلیې وزارت له دې وړاندې د حقوقي مرستو، حقوقي مشورو وړاندې کولو او په نورو برخو کې د ناروې د کډوالو له شورا سره هوکړه لیک لاسلیک کړی وو.
