د مدافع وکیلانو د درېیمې دورې ورودي ازموینه د څه باندې ۵۰۰ تنو متقاضیانو په ګډون سره واخیستل شوه
د افغانستان اسلامي امارت د عدلیې وزارت د دفاع وکالت د درېیمې دورې ورودي ازموینه د دفاع وکالت د جواز څه باندې ۵۰۰ تنو غوښتونکو په ګډون سره د یاد وزارت په مقر کې واخیسته.
دا ازموینه د محرم الحرام د میاشتې په ۱۶ نېټه د دوشنبې په ورځ د عدلیې وزارت مسلکي معین، شیخ الحدیث مولوي عبدالکریم حیدر، د مدافع وکیلانو رئیس مولوي رحمت الله حقاني او د یاد وزارت د نورو مقاماتو په ګډون سره واخیستل شوه.
د عدلیې وزارت مسلکي معین د یادې ازموینې پرانیستې برنامې ته په خپله وینا کې وویل چې د یو مسؤولیت ترلاسه کولو لپاره اساسي شرط، په هغې څانګه کې د وړتیا او مهارت درلودل دي او د عدلیې وزارت په همدې منظور د دفاع وکالت له جواز غوښتونکو څخه ازموینه اخلي ترڅو په شرایطو برابر کسان مشخص کړي.
نوموړي زیاته کړه چې یاد وزارت هڅه کړې ترڅو د دفاع وکالت جواز غوښتونکو لپاره لازمې آسانتیاوې رامنځته کړي او د مدافع وکیلانو ستونزو ته هم رسیدګي وکړي. نوموړي زیاته کړه چې د دفاع وکالت د جواز غوښتونکو ستونزو په پام کې نیولو سره د دفاع وکالت د ستاژ برنامه په آنلاین بڼه جوړیږي او یواځې په عملي کار او ازموینه کې یې د څو محدودو ورځو لپاره د ستاژرانو حضور ضروري دی.
شیخ الحدیث مولوي عبدالکریم حیدر د دفاع وکالت جواز غوښتونکو ته په خطاب سره وویل چې تاسو په ازموینه او نورو پړاونو کې په بریالیتوب او جواز اخیستلو سره، د اسلامي امارت له نظام او عدلیې وزارت څخه استازیتوب کوئ او ټینګار یې وکړ چې سیرت او صورت مو باید د اسلامي شریعت مطابق واوسي.
دغه راز د عدلیې وزارت مسلکي معین ټینګار وکړ چې د مدافع وکیلانو نیت له خپلو دندو څخه یوازې د پیسو موندل و نه اوسي بلکې نیت یې باید ټولنې ته د ښو خدمتونه وړاندې کول واوسي؛ ځکه هغوی د ټولنې د هغې بېوزلې او بېوسې طبقې استازیتوب کوي چې په قضایي بنسټونو کې له خپلو حقونو څخه په خپله دفاع نه شي کولای.
په یاده برنامه کې د عدلیې وزارت د مدافع وکیلانو رئیس، مولوي رحمت الله حقاني هم خبرې وکړې او د ازموینې ګډونوالو ته یې د ازموینې پروسې او د هغې راتلونکو پړاونو له روڼتیا څخه ډاډ ورکړ. دغه راز نوموړي د نږدې درېیو کلونو په اوږدو کې د یاد ریاست لاسته راوړنې او فعالیتونه بیان کړل او زیاته یې کړه چې په همدې موده کې سلګونو تنو غوښتونکو ته، د ازموینې له اخیسلتو څخه وروسته د دفاع وکالت جوازونه ویشل شوي او د مدافع وکیلانو ستونزو ته د رسیدګۍ په موخه هم په ټولو زونونو کې د مدافع وکیلانو آمریتونه جوړ شوي دي.
دغه راز نوموړي وویل چې د عدلیې وزیر شیخ الحدیث مولوي عبدالحیکم شرعي په مشرۍ د مدافع وکیلانو کمېسیون رامنځته شوی، د دوو ناستو په ترڅ کې یې د مدافع وکیلانو ستونزې بررسي کړي او د هغو د لرې کولو په هکله لازم اقدامات ترسره کړي.
