د عدلیې وزارت په مدرسة العدالة کې د حدیثو درېیمه دوره او د دیني درسونو نورو درجو پیل
د عدلیې وزارت په مدرسة العدالة کې د حدیثو درېیمه دوره او د دیني درسونو نورې درجې پیل او په رسمي توګه د یاد وزارت مقاماتو له خوا پرانیستل شوې.
د یادې دورې د پرانیستې په مراسمو کې د عدلیې وزارت مسلکي معین شیخ الحدیث مولوي عبدالکریم حیدر، د قانون جوړونې د چارو ریاست مرستیال شیخ رکن الدین عتیق، مالي او اداري رئیس مولوي سید حبیب الحبیب، د دعوت او ارشاد رئیس مولوي سعید الرحمن سید او د یاد وزارت نورو رئیسانو او مسؤولینو حضور درلود.
په دغو مراسمو کې د عدليې وزارت مسلکي معین شیخ الحدیث مولوي عبدالکریم حیدر د اسلام په پراختیا او پیاوړتیا کې د دیني مدرسو او علماوو رول مهم وباله.
هغه ټینګار وکړ، هر هغه یرغل چې پر افغانستان باندې د کفارو او یرغلګرو له خوا په بېلابېلو وختونو کې شوی، د اسلام له منځه وړلو په موخه وو خو علماوو او مدرسو د دغو یرغلونو او اشغال پر وړاندې درېدلي او یرغلګرو ته یې اجازه نه ده ورکړې چې خپلو موخو ته ورسېږي.
د نوموړي په وینا د تاریخ په اوږدو کې د علماو په هلو ځلو سره، د اسلام لهمنځه وړلو لپاره هڅې د اسلام د پیاوړتیا سبب شوي او علما او دا چې نن په هېواد کې اسلامي نظام حاکم دی هم د علماوو او مدرسو برکت دی.
په دغو مراسمو کې د عدلیې وزارت مالي او اداري رییس مولوي سید حبیب الحبیب هم وویل چې دیني مدرسو په تېرو څو لسیزو کې د ولس له ایمان څخه ساتنه کړې او په هغو هېوادونو کې چې مدرسې شتون نه لري، ولس یې اسلام تش په نامه سره پېژني.
د پرانیستې په دې ناسته کې د عدليې وزارت د قانون جوړونې د چارو عمومي ریاست مرستیال شیخ رکن الدین عتیق هم صحیح البخاري کتاب قرائت کړ او د یاد کتاب او د امام بخاري (رح) د شخصیت او مقام په اړه یې هم معلومات وړاندې کړل.
د عدلیې وزارت په مدرسة العدالة کې د حدیثو په درېیمه دوره او د دیني درسونو نورو درجو کې د یاد وزارت ۴۱ تنو کارمندان په غیر رسمي وختونو کې د پورته درسونو زده کړې ترسره کوي.
