د عدلیې وزارت او کابل ښاروالۍ ترمنځ د همغږۍ ناسته ترسره کېدل
د کابل ښاروالۍ له استازو سره د عدلیې وزارت د همغږۍ ناسته د عدلیې وزارت د انسجام لوی رئیس مولوي حافظ عبدالصمد عمري په مشرۍ او د یاد ریاست د نورو مسؤولینو په ګډون جوړه شوه.
په دغې ناسته کې چې د شوال د مياشتې په ۱۲ مه نېټه د یکشنبې په ورځ د عدلیې وزارت په مقر کې جوړه شوه، د عدلیې وزارت او د ښاروالۍ ترمنځ د یو شمېر موضوعاتو په هکله بحث او خبرې وشوې.
په یاده ناسته کې د ښاروالۍ له لوري د عدلیې وزارت د انسجام رياست د اتحادیو جوازونو ته د ارزښت نه ورکولو، خيريه بنسټونو سره د یادې ادارې د نه همغږۍ، د موټرو پلورنکو اتحادیې د جمعه بازار او ځينو نورو موضوعاتو په تړاو چې د دواړو ادارو ترمنځ همغږۍ شتون نه درلود خبرې وشوې.
د عدلیې وزارت د انسجام عمومي رئیس د کابل ښاروالۍ له استازو څخه وغوښتل چې هېوادوالو لپاره د سهولت د رامنځته کولو په موخه له یاد وزارت سره همکاري وکړي.
په ورته مهال د کابل ښاروالۍ استازو، د ستونزو د حل او د لا زياتو همکاریو په برخه کې د عدلیې وزارت ته ډاډ ورکړ.
