د روژې په میاشتې کې اړمنو ته په مرستو د پکتیا د عدلیې رئیس ټینګار
د پکتیا ولایت، عدلیې رئیس مولوي محمد رئیس محمدي په یاد ولایت کې د فعالو خیریه بنسټونو له مسؤولینو سره په یوې ناسته کې، ټینګار وکړ چې د یادو بنسټونو له خوا د روژې په میاشت کې اړمنو ته د مرستو رسولو په برخه کې، اقدام وشي.
دغه ناسته د شعبان د میاشتې په ۲۴ نېټه د چهارشنبې په ورځ د عدلیې ریاست په مقر کې جوړه شوه او د اتحادیو مسؤولینو هم په کې حضور درلود. د پکتیا ولایت، عدلیې رئیس په خپلې وینا کې، د خیریه بنسټونو او اتحادیو مسؤولین خپلو مسؤولیتونو ته متوجې کړل او له هغوی څخه یې وغوښتل چې له دغه ریاست سره همکاري او همغږي ولري.
دغه راز نوموړي وویل چې خیریه بنسټونو دې اساسي کارونو لکه ښوونې او روزنې ته زیاته توجو وکړي، د اسلامي امارت د پالیسۍ خلاف د مرستو له بهیر څخه ویډیوګانې وانخلي، د اړمنو عزت په پام کې ولري او د روژې مبارکې میاشت کې اړمنو ته د مرستو لپاره اساسي اقدامات وکړي.
نوموړي د اتحادیو له مسؤولینو هم وغوښتل چې خپل کارونه په منظم ډول ترسره کړي او خپل راپور په منظم ډول له عدلیې ریاست سره شریک کړي.
په دې ناسته کې د اتحادیو او خیریه بنسټونو مسؤولینو هم خبرې وکړې او ډاډ یې ورکړ چې د احکامو او قوانینو مطابق به فعالیت وکړي.
