د افغانۍ پیسو د ترویج په موخه د پکتیا ولایت د موټرپلورونکو له اتحادیې سره ناسته جوړیدل
پکتیا ولایت کې د افغانۍ پیسو د ترویج په موخه توظیف شوي ګډ پلاوي د یاد ولایت د موټرپلورونکو اتحاديې له رئیس او یو شمېر غړو سره د عدلیې ریاست په مقر کې یوه ناسته جوړه کړه.
په دې ناسته کې چې د شعبان د میاشتې په ۱۰ نېټه د چهارشنبې په ورځ جوړه شوه، د عدلیې رئیس او د یاد هيئت نورو غړو حضور درلود او د موټرپلورونکو اتحادیې مسؤولینو ته یې توصیه وکړه چې د پېر او پلور په معاملاتو کې د بهرنیو اسعارو له استفادې څخه ډډه وکړي ترڅو د افغانۍ پیسو ارزښت خوندي شي.
د یادې اتحادیې مسؤولینو هم د دغه تصمیم په هرکلي سره، ژمنه وکړه چې د یادې اتحادیې غړي ټول موټرپلورونکي به، وروسته له دې خپل معاملات په افغانۍ پیسو ترسره کړي.
