په کنړ ولایت کې نږدې ۴۰ جریبه امارتي ځمکه تثبیت شوه
د کنړ ولایت د ځمکو د غصب د مخنیوي تخنیکي هیئت د یاد ولایت په څوکۍ ولسوالۍ کې د یوې کادستري ټوټې په بررسۍ سره، ۳۹.۵ جریبه امارتي ځمکه تشخیص او تثبیت کړه.
د یاد هیئت یو ټیم د شعبان د میاشتې په ۱۰ نېټه د چهارشنبې په ورځ د څوکۍ ولسوالۍ کلماني ساحې ته ولاړ او د کادستري ۱۱۹۸ امارتي ټوټه یې بررسي کړه. هیئت په دې بررسۍ سره ۳۹.۵ جریبه ځمکه چې ۷۹ تنو غاصبینو له خوا په دې امارتي ټوټه کې غصب شوې وه، تثبیت کړه او د غاصبینو شهرت یې په جدول کې درج کړ.
له بلې خوا د تخنیکي هیئت یو ټیم د یاد ولایت د کرنې په ریاست کې د یوې ناستې په جوړولو سره، د ځمکو د غصب اړوند یو شمېر دوسیې بررسي کړې او په دې هکله یې لازم تصامیم ونیول.
