په سرپل ولایت کې د ۷۵ جریبه غصب شوې ځمکې بررسي او تثبیت
د سرپل ولایت د ځمکو د غصب د مخنیوي تخنیکي هیئت د رجب المرجب د میاشتې په ۱۲ نېټه د چهارشنبې په ورځ سوزمه قلعه ولسوالۍ ته په سفر سره، په دې ولسوالۍ کې ۷۵ جریبه للمي ځمکه بررسي او تثبیت کړه.
یاد سفر د سرپل ولایت د تخنیکي هیئت او د مقام تر منځ د غونډې د پریکړې په اساس ترسره شو او هیئت لومړی د سوزمه قلعه او الجهاد ولسوالیو ترمنځ ساحه، د هغو ترمنځ د پولې د تعیین په موخه بررسي کړه.
تخنیکي هیئت د سرپل د سنګتوده ساحې له بررسۍ او نښاني کولو څخه وروسته، د سوزمه قلعه ولسوالۍ د سبزکلان بورقوت په ساحه کې ۷۵ جریبه غصب شوې ځمکه بررسي، تثبیت او تشخیص کړه چې د څېړنو له بشپړولو څخه وروسته به یې په اړه تصمیم ونیول شي.
