په کندز ولایت کې کابو ۴۱۴ جریبه امارتي ځمکه تثبیت شوه
د كندز ولایت د ځمکو د غصب د مخنیوي تخنیکي هیئت د رجب المرجب د میاشتې په ۲ نېټه د یکشنبې په ورځ د خپلې نوبتي ناستې په جوړولو او د ځمکو د غصب اړوندو دوسیو په بررسۍ سره، د یاد ولایت په دوو ولسوالیو کې کابو ۴۱۴ جریبه ځمکه امارتي تثبیت کړه.
یاد هیئت په دې ناسته کې د دشت ارچي ولسوالۍ د وزیر آباد ساحې د ۳۵۷ جریبه ځمکې او د امام صاحب ولسوالۍ د باسوس ساحې د ۵۷ جریبه ځمکې دوسیې بررسي کړې. د بررسۍ په پایله کې یادې دواړه ټوټې ځمکې د ۱۳۵۴ او ۱۳۵۶ هجري لمریز کلونو د کادستري سندونو له مخې امارتي تثبیت شوې او هیئت په دې هکله لازمې لارښوونې وکړې.
په دې ناسته کې د عسقلان ساحې د ۶۰ جریبه ځمکې دوسیه او یو لړ متفرقه موضوعات هم بحث او بررسۍ لاندې ونیول شوو او په هکله یې لازم تصامیم ونیول شوو.
