د عدليې وزارت د املاکی قضیو د ریاست د نوي رئیس معرفي
د عدليې وزارت د مقام د وړاندیز او د اسلامي امارت د ریاست الوزراء د عالي ریاست د منظورۍ په اساس، د عدلیې وزارت د قانون جوړونې د چارو د انستیتوت لوی ریاست د سوداګرۍ او خصوصي سکتور د قوانینو د دیپارتمنت رئیس مولوي عبدالواجد حلیم تبدیلاً د امارت د قضایاو د لوی ریاست د املاکي قضایاو د رئیس په حیث تقرر ترلاسه کړ.
په هغو مراسمو کې چې د ربیع الثاني د میاشتې په ۱۱ نېټې د پنجشنبې په ورځ د نوموړي د معرفۍ په منظور د عدلیې وزارت په مقر کې جوړ شوي وو، د امارت د قضایاو لوی رئیس مولوي احسان الله وثیق، د بشري سرچینو رئیس مولوي رحمت الله حلیم او د عدلیې وزارت یو شمېر نورو مرکزي رئیسانو او کارمندانو برخه اخیستې وه.
په دغو مراسمو کې، د امارت د قضایاو لوی رئیس د موضوع په تړاو خبرې وکړې او د اسلامي امارت د مسؤلینو هلې ځلې او زحمتونه او په تېرو دوو کلنو کې ترسره شویو پرمختګونه یادونه وکړه. نوموړي د یاد ریاست کارمندانو ته د املاکي قضیو د نوي رئیس له اهلیت او وړتیا څخه ډاډ ورکړ او هیله یې څرګنده کړه چې دغه ریاست ته د نوموړي په راتګ سره به په یاد ریاست کې د پام وړ بدلونونو او پرمختګونو شاهدان واوسو. دغه راز نوموړي د املاکي قضیو له نوي رئیس سره د هر ډول همکاریو ډاد ورکړ.
په دغو مراسمو کې، د عدلیې وزارت د بشري سرچینو رئیس، د املاکي قضیو نوی رئیس د یاد ریاست کارمندانو ته معرفي کړ او د نوموړي سوابق او کاري تجربې یادې کړې.
د عدلیې وزارت د املاکي قضیو نوي رئیس هم د عدلیې وزارت د مشرتابه مقام له اعتماد څخه مننه وکړه او ژمنه یې وکړه چې د خلکو او د افغانستان اسلامي نظام ته د خدمت په لار کې به له هیڅ ډولو هلو ځلو څخه ډډه و نه کړي.
