په کندز ولایت کې څه دپاسه د ۱۱ جریبه ځمکې استرداد
د کندز ولایت د ځمکو د غصب د مخنیوي د تخنیکي هیئت ناسته د ربیع الاول د میاشتې په ۲۳ نېټې د یکشنبې په ورځ د یاد هیئت د رئیس او غړو په حضور سره جوړه شوه او د ځمکو د غصب اړوند یو شمېر دوسیې په کې بحث او بررسۍ لاندې ونیول شوې.
په دغې ناسته کې، د ګل تپې ولسوالۍ د توبره کش ساحې د ۱۱ جریبه او ۱۵ بسوې ځمکې دوسیه بحث او بررسۍ لاندې ونیول شوه او د هغې په امارتي توب د غیر شرعي متصرفینو له اعتراف اخیستلو څخه وروسته، یاده شوې ځمکه استرداد شوه او لارښوونه وشوه چې راپور یې مرکزي کمېسیون ته واستول شي.
په دغې ناسته کې د عسقلان ساحې د ۲۰ جریبه ځمکې دوسیه هم، بحث او بررسۍ لاندې ونیول شوه او امارتي تثبیت شوه او د ساحې د بررسۍ او د څېړنو بشپړولو په منظور له تخنیکي هیئت څخه یو ټیم توظیف شو.
د دغه ولایت د مرکز د ترکمن قدق په آق سای ساحې کې د ۱۳۰۰ جریبه ځمکې دوسیه هم په دغې ناسته کې بحث او بررسۍ لاندې ونیول شوه او د ځمکې د متصرف د سندونو د تطبیق او د ساحې د سکیچ او کروکي لپاره له تخنیکی هیئت څخه یو ټیم توظیف شو ترڅو د هغې څېړنې بشپړې او راپور یې مرکزي کمېسیون ته واستول شي.
