د عدليې په وزارت کې د تهیې او تدارکاتو د مدیریت د زده کړییزې برنامې پای
د تهيې او تدارکاتو د مدیریت زده کړه ییزه برنامه چې د عدلیې وزارت د بشري سرچینو د ریاست له لوري د ۳۳ ولایتونو د عدليې ریاستونو د تهیې او تدارکاتو مدیرانو لپاره د عدلیې په وزارت کې جوړه شوې وه، د صفرالمظفر د میاشتې په ۲۰ نېټې د چهارشنبې په ورځ پای ته ورسیده.
د یادې برنامې په پاي کې د عدليې وزارت د تقنین لوی رئیس مفتي فضل هادي صاحبزاده، د بشري سرچینو رئیس مولوي رحمت الله حلیم، د زده کړو آمر، ښوونکو او د یاد ریاست نورو مسؤلینو برخه اخیستې وه.
د عدليې وزارت د تقنین رئیس په دغې برنامې کې د ګډونوالو له فعالې برخې اخیستنې څخه مننه او قدرداني څرګنده کړه او له لوی څښتن تعالی څخه یې استدعا وکړه چې د هغوی هڅې او هاندونه د خپل په دربار کې قبول کړي. نوموړي هیله څرګنده کړه چې دغه برنامه هغوی له پاره ګټوره اوسیدلې وي او د هغوی د کارونو پرمخ وړلو کې اغیزمنه واوسي.
د عدلیې وزارت د تقنین رئیس د دغې برنامې برخه اخیستونکو ته توصیه وکړه چې د خپلو کارونو په ترسره کولو کې له بشپړ صداقت او ایماندارۍ څخه کار واخلي او خپل کارونه په امانت دارۍ او له اسلامي شریعت سره سم ترسره کړي.
په دغې برنامې کې چې د څلورو ورځو له پاره جوړه شوې وه، د افغانستان د ۳۳ ولایتونو د عدلیې ریاستونو د تهیې او تدارکاتو مدیران بلل شوي وو او هغوی ته د تهیې او تدارکاتو د مدیریت، د اداري مراسلاتو او د دوسیه بندۍ د څرنګوالي په اړه زده کړې ورکړل شوې.
