کاپيسا ولایت کې د ۱۵۰۰ جریبه امارتي ځمکې بررسي
د کاپیسا ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۹ نېټه د چهارشنبې په ورځ د دغه هیئت د رئیس او غړو په حضور سره جوړه شوه او د یاد ولایت په ارچي دښتې او مرکز کې د تخنیکي هیئت د لاسته راوړنو او د کار د پایلو راپور په کې وړاندې شو.
په دغې ناسته کې، د تخنیکي هیئت غړو د ګلبهار نساجي ریاست د ځمکو اړوند د حصه اول کوهستان ولسوالۍ د سنجن، قلعه میرا او پفدم کلیو د اوسیدنکو عریضې ته رسیدګي وکړه او تصمیم يې ونیو ترڅو تخنیکي هیئت یو ځل بیا د خلکو شکایتونو د حل او د یاد ریاست د املاکو اتلاف څخه د مخنیوي په منظور ساحې ته سفر وکړي.
په یاده ناسته کې، د تخنیکي هیئت منشي د یاد ولایت د مرکز اړوند عاشقانو دښته کې د فني ټیم د اجراآتو راپور وړاندې کړ او ویې ویل چې دغې ساحه کې د ۲۰۰۰ جریبه امارتي ځمکې له مجموعې څخه تر دې دمه د هغې ۱۰۰۰ جریبه د فني ټیم له خوا بررسي او متراژ شوې او د هغې د غاصبینو او متصرفینو شهرت هم جدول کې درج شوی او د یادې ساحې پر پاتې برخه کار روان دی.
تخنیکي هیئت له بحث او د نظرونو له تبادلې څخه تصمیم ونیو چې د یادې ځمکې ټول متصرفین د امنیه قوماندانۍ له لارې جلب او له هغوی څخه سندونه او مدارک وغوښتل شي.
په دغې ناسته کې د ارچي دښتې د ځمکو د تثبیت او بررسۍ راپور هم وړاندې شو چې پر اساس یې تر دې دمه په دغې ساحه کې ۵۰۰ جریبه ځمکه متراژ او بررسي شوې او د هغې د غاصبینو او متصرفینو شهرت هم په جدول کې درج شوی او د یادې ساحې پر پاتې برخه کار روان دی.
