پکتیا ولایت ته د ځمکو د غصب د مخنیوي کمېسیون د استول شوي پلاوی سفر او د یاد ولایت د تخنیکي هیئت د فعالیتونو بررسي
د امارت د قضایاو د لوی رئیس او د کمېسیون د سکرتر په مشرۍ د ځمکو د غصب د مخنیوي او د غصب شویو ځمکو د استرداد کمېسیون استول شوي پلاوي، یو شمېر ولایتونو د سفر په ترڅ کې د ذوالحجې د میاشتې په ۲۳ نېټه د سه شنبې په ورځ پکتیا ولایت ته ورسید او د یاد ولایت له تخنیکي هیئت سره یې ناسته جوړه کړه.
تخنیکي هیئت په یاده ناسته کې د دغه هیئت د ترسره شوو فعالیتونو او لاسته راوړنو په اړه معلومات او مفصل راپور وړاندې کړ او د ځمکې د غصب د مخنیوي کړنلارې او مقررې په اړه هم بحث ترسره شو.
د کمېسیون استول شوي پلاوي له تخنیکي هیئت سره د ځمکو د غصب د مخنیوي بېلابېلو موضوعاتو او ننګونو په اړه خبرې وکړې او د تخنیکي هیئت ستونزې يې هم واورېدلې. یاد پلاوي ډاډ ورکړ چې ستونزې به ډیر ژر حل شي.
استول شوي پلاوي له ناستې څخه وروسته، د تخنیکي هیئت دوسیې او ترسره شوي اجراآت و ارزول او د هیئت فعالیتونه یې وستایل. په همدې توګه یاد هیئت دوسیو کې شته ستونزې او نیمګړتیاوې په ګوته کړي او د هغو د حل په برخه کې تخنیکي هیئت ته لازمې لارښوونې وکړې.
