کاپیسا ولایت کې نږدې ۱۵۰۰ جریبه ځمکه امارتي تثبیت شوه
د کاپیسا ولایت د ځمکو د غصب د مخنیوي تخنیکي هیئت د تېرو دریو ورځو په ترڅ کې د دغه ولایت په مرکز کې سلګونه جریبه ځمکه امارتي تثبیت او استرداد له پاره آماده کړه.
دغه هیئت له تخنیکي ټیم سره د کاپیسا مرکز کې دروازه ګي ساحې ته ولاړ او ټولې امارتي ساحې یې بررسي او تثبیت کړې. یاد شوي هیئت د ساحې په بررسۍ سره ۱۴۷۸.۸۵۲ جریبه ځمکه امارتي تثبیت او استرداد له پاره آماده کړي.
یاده شوې ساحه د ۱۰۱ تنو لخوا غصب شوې او په کې انګړونه، بڼونه او یو څه کرنیزې ځمکې جوړې شوې او یوه لږه برخه یې سپينه پاتې شوې ده. د یادې ساحې معلومات واخیستل شول او اړونده جدول کې درج شول.
تخنیکي هیئت د دغې ساحې له متصرفینو څخه سندونه وغوښتل چې د هغو یو شمېر سندونه وړاندې نه شو کړلی او یو شمېر نورو د یادو شویو ځمکو په امارتي توب اعتراف وکړ. یاده ځمکه به په راتلونکو ورځو کې استرداد شي.
