د بادغیس ولایت تخنیکي هیئت بالامرغاب او غورماچ ولسوالیو ته ولاړ او لازم اقدامات یې ترسره کړل
د بادغیس ولایت د ځمکو د غصب د مخنیوي تخنیکي هیئت (د ذوالقعدې میاشتې په ۱ نېټه) د تېرې اوونۍ د یکشنبې په ورځ بالامرغاب او غورماچ ولسوالیو ته سفر وکړ او د غصب شویو ساحو د ثبیت او تشخیص برخه کې لازم اقدامات ترسره کړل.
یاد شوي هیئت د بالامرغاب ولسوالۍ له مسوولینو او مشرانو سره وکتل او له هغوی سره یې د ځمکو د غصب د مخنیوي په اړه خبرې وکړې. دغه راز هیئت غورماچ ولسوالۍ ته ولاړ او له سیمه ییزو مسوولینو او د دغې ولسوالۍ له مشرانو سره یې وکتل. د دغې ولسوالۍ سیمه ییزو مسوولینو له دغه هیئت سره د لازمو همکاریو ژمنه وکړه.
یاد هیئت د غورماچ ولسوالۍ له بېلابېلو قومي مشرانو سره چې د مادر نائیب بند کې د کلترونو عامه څړځایونو په ساحې کې استوګنه لري وکتل او له هغوی څخه یې د معلوماتي استعلامونو په ترڅ کې معلومات وغوښتل.
هغوی د څړځای د عامه توب برخه کې خپل اقرار او اعتراض بیان کړ او ژمنه یې وکړه چې په ساحه کې د شخصي ملکیت ادعا نه لري او مالکانه تصرف په کې نه کوي او د نورو مخنیوي به هم نه کوي. دغه هیئت یاده ساحه هم بررسي کړه.
