د کنړ ولایت عدليې ریاست د یاد ریاست د ۱۴۰۱ مالي کال د اجراآتو راپور وړاندې کړ
د کنړ ولایت عدلیې ریاست د ۱۴۴۴ هجري قمري کال د روژې میاشت په ۱۱ نېټه د یکشنبې په ورځ د هغې ناستې په ترڅ کې چې د یاد ولایت په مقام کې د امارتي ادارو د حساب ورکوونې په منظور جوړه شوې وه، د یاد ریاست د ۱۴۰۱ مالي کال د فعالیتونو او اجراآتو راپور د دغه ولایت مقام ته وړاندې کړ.
په دغې ناسته کې چې د دغه ولایت د مقام د لارښوونې پر اساس جوړه شوې وه، ټولو امارتي ادارو د ۱۴۰۱ مالي کال د خپل د فعالیتونو او لاسته راوړنو راپور وړاندې کړ.
په یاده ناسته کې، د کنړ ولایت د عدلیې رئیس مفتي عبدالستار حماس هم د یاد ریاست د ۱۴۰۱ مالي کال د فعالیتونو او لاسته راړونو راپور وړاندې کړ او ویې ویل چې دغه ریاست د حقیقي او حکمي اشخاصو د حقونو ترلاسه کولو په برخه کې ۲۹۴۱ عریضې بررسۍ کړې چې د یادو عریضو یو شمېر یې اصلاح او یو شمېر نورې یې د محکمې له حکم څخه وروسته تطبیق کړي دي.
نوموړي زیاته کړه چې یاد ریاست په همدې توګه د امارت د قضایاو په برخه کې د امارتي ادارو منقول او غیر منقول ملکیتونو څخه دفاع کړې او هغه یې له غاصبینو څخه آزاده او حکومت ته یې سپارلې دي.
دغه راز د کنړ ولایت د عدليې رئیس وویل چې دغه ریاست د ۱۰۲ تنو بې وزله اشخاصو له حقونو څخه په وړیا ډول د محکمو پر وړاندې دفاع کړې او ۲۱۰۹ تنو ته یې حقوقي پوهاوی وړاندې کړی دی. دغه راز نوموړي زیاته کړه چې یاد ریاست ۶۸ تنو ته د عریضې د لیکنې او ۶ تنو نورو ته د معاملو د لارښوونې جواز لیکوونه ویشلي دي او ۹۹۱۰۸ افغانۍ عواید یې راټول او د اسلامي امارت خزانې ته یې تحویلې کړې دي.
