د ننګرهار ولایت له والي او اوسیدونکو سره د ځمکو د غصب د مخنیوي کمېسیون د مشرتابه پلاوي کتنه
د ځمکو د غصب د مخنیوي او د غصب شویو ځمکو د استرداد کمېسیون د مشرتابه پلاوي، د ۱۴۴۴ هجري قمري کال د شعبان میاشت په ۲۲ نېټه د سه شنبې په ورځ د عدليې وزارت د سرپرست شیخالحدیث مولوي عبدالحکیم شرعي په مشرۍ او د کور او ښار جوړولو وزارت، لوی څارنوالۍ د سرپرستانو او د چارو د ادارې د لوی رئیس په ګډون د ننګرهار ولایت له والي الحاج ملا محمد نعیم آخوند سره ددغه ولایت د ښاروالۍ په میلمستون کې وکتل او خبرې ورسره وکړې.
دغې ناسته کې، د ځمکو د غصب د مخنیوي کمېسیون رئیس ددغه کمېسیون غړي د ننګرهار ولایت والي ته وروپېژندل او له نوموړي سره يې دغه ولایت ته د یاد کمېسیون د غړو د سفر موخه شریکه کړه او دغه راز ساحو ته د تخنیکي ټیمونو د استولو او د دوسیو د بررسۍ په اړه له نوموړي سره خبرې وکړې.
وروسته یاد کمېسیون د جلال آباد ښار د لومړۍ او دریمې ناحیو له اوسیدونکو سره ددغه ولایت د ښاروالۍ په مېلمستون کې د بېلابیلو ناستو په ترڅ کې وکتل او له هغوی څخه یې د هغوي په تصرف کې د ځمکو په اړه سندونه وغوښتل او هغوی ته يې د قانون په چوکاټ کې د ترحم او شفقت ډاډ ورکړ.
دغه راز یاد کمېسیون ددغه ولایت د سرخ رود ولسوالۍ د ګیلاني ښارګوټي له اوسیدونکو سره وکتل او د هغوی ستونزې یې واوریدلې او له هغوی څخه یې د هغوي په تصرف کې د ځمکو په اړه، سندونه وغوښتل.
ددغه کمېسیون رئیس هغوی ته وویل؛ هغه ځمکې چې معتبر سندونه و نه لري، د امارت ملکیتونه دي او د هغو په اړه له هیچا سره معامله او تسامح نه کیږي.
دغه راز د ځمکو د غصب د مخنیوي کمېسیون مشرتابه د کنړ ولایت د تخنیکي هیئت له غړو سره ددغه ولایت د ښاروالۍ په مېلمستون کې وکتل او هغوی ته یې لازمې سپارښتنې او لارښوونې وکړې. ددغه کمېسیون مشرتابه د کنړ ولایت تخنیکي هیئت ته؛ په کارونو کې د چټکتیا او د مقررې او اړوند لایحې د بشپړ پلي کولو ټینګار وکړ.
د کنړ ولایت تخنیکي هیئت هم خپل ننګونې او ستونزې ددغه کمېسیون له مشرتابه پلاوي سره شریک کړل چې هغوی ته د کمېسیون له لوري د ستونزو د حل ډاډ ورکړل شو.
