د جوزجان او غزني ولایتونو د تخنیکي هیئتونو ناستې جوړې شوې
د جوزجان او غزني ولایتونو د ځمکې د غصب د مخنیوي د تخنیکي هیئتونو ناستې ددغو هیئتونو د رییسانو او غړو په حضور سره جوړې شوې او دغو ولایتونو کې د امارتي ځمکو د غصب د مخنیوي په برخه کې لازم اقدامات هم ترسره شول.
د جوزجان ولایت د تخنیکي هیئت په ناسته کې د ولایت د مرکز او د خواجه دوه کوه او قوشتپه ولسوالیو ترمنځ د عامه مرعی ځمکې په اړه د هیئت راپور بررسي شو او پریکړه وشوه چې څېړنې بشپړې نه دي او باید ژر تر ژره بشپړې شي.
په دغې ناسته کې، د بابه علي کلي د نواقلو عریضې هم بررسي شوې او ددغه هیئت سکرتریت موظف شو چې موضوع بررسي کړي او د سندونو او معلوماتو له راټولولو څخه وروسته خپل راپور هیئت ته وړاندې کړي.
دغه راز په یاده ناسته کې، د F پروژې د سړک په مسیر کې د افغان ګاز تصدۍ د غصب شوې ځمکې په اړه د مرکزي کمېسیون لیک بررسي شو او تصدۍ او د یادې ځمکې متصرفینو له پاره معلوماتي استعلام ولیکل شو. یاد شوي هیئت پریکړه وکړه چې د معلوماتو له راټولولو څخه وروسته، هیئت سندونه له ساحې سره تطبیق کړي.
یاد هیئت د یو شمېر اشخاصو عریضې د ښاروالۍ او د هغوی تر منازعې لاندې د یو مارکېټ په اړه بررسي کړې او ددغه ولایت ښاروالۍ ته استعلام ترتیب ورکړ. یاد هیئت ددغه هیئت سکرتریت ته دنده وسپارله چې موضوع د ښاروالۍ په همکارۍ په بشپړ دقت سره بررسي کړي.
په یاده ناسته کې د دالي مهاجر، ینګي اریغ، چوباش، قزلیاق، بابه علی او سه شنبه کلیو د اوسیدونکو عریضې هم بررسي شي او د کرنې ریاست ته دنده وسپارل شوه چې اړوند سندونه راټول کړي او د څېړنو له بشپړولو څخه وروسته خپل راپور هيئت ته وړاندې کړي.
په همدې حال کې، د غزني ولایت د تخنیکي هیئت ناسته هم ددغه هیئت د رییس او غړو په حضور سره جوړه شوه او د مهمو موضوعاتو په اړه پکښې بحث او د نظر تبادله وشوه او ددغه هیئت غړو خپل نظرونه هم دغې برخه کې وړاندې کړل.
