ننګرهار او کاپیسا ولایتونو کې کابو ۶۵۰۰ جریبه ځمکه امارتي تثبیت شوه
د ننګرهار ولایت د ځمکې د غصب د مخنیوي تخنیکي هیئت ددغه ولایت شیرزاد ولسوالۍ ته ولاړ او ددغې ولسوالۍ په ګندمک کلي کې يې کې ۵۷۲۳ جریبه ځمکه امارتي ځمکې تثبیت او تشخیص کړه. کاپیسا ولایت کې هم نږدې ۷۵۰ جریبه غصب شوې ځمکه امارتي تثبیت او استرداد شوه.
د ننګرهار ولایت تخنیکي هیئت په ګندمک کلي د لقمان خیل او پننګزیو قوم ترمنځ یې تر شخړې لاندې دښتې څخه چې ددغې دښتې مساحت ۳۵۲۹ جریبه دی لیدنه وکړه. یادو قومونو هیڅ ډول سند نه درلود ددغې دښتې ځمکه امارتي تثبیت شوه. هیئت یاد شوو قومونو ته ټینګار وکړ چې له تصرفاتو څخه ډډه وکړي ګني بیا به عدلي او قضايي ارګانونو ته معرفي شي.
ددغه کلي یوې بلې ساحه کې ۲۱۹۴ جریبه ځمکه چې د غصب په حال کې وه، امارتي تثبیت شوه او مسوولینو ته لارښوونه وشوه چې هیچا ته اجازه ورنکړي چې امارتي ځمکه کې کار یا هغه تصرف کړي.
په همدې حال کې، د کاپیسا ولایت د تخنیکي هیئت ناسته د نجراب ولسوالۍ د موسی خان دښتې پاتې سیمو د امارتي ځمکو د غصب د مخنیوي او د امارتي ځمکو د استرداد او د سولانک دښتې د پاتې برخو د تثبیت په منظور جوړه شوه.
د ځمکې د ادارې د معلوماتو پر اساس سولانک دښته کې له ۴۰۰۰ جریبو څخه زیاته ځمکه وجود لري چې د هغې ۷۵۰ جریبه د دفاع وزارت د تنقیصانو له پاره د ښارګوټي جوړو له پاره ځانګړي شوې ده خو د اړوند ادارو د زورواکو د مداخلې په دلیل مستحقو له پاره د نمرو ویشلو ته بریالي شوي نه دي. یاده شوې ټوله ساحه غصب شوې ده.
ددغې ساحې له غاصبانو څخه سندونه وغوښتل شول چې هیڅ ډول سند یې نه درلود. هیئت د دفاع وزارت د تنقیصانو د ښارګوټي اړوند ۷۵۰ جریبه ځمکه استرداد کړه او اړوند ادارو ته يې تسلیم کړه.
د یادې ځمکې څه د پاسه پر ۳۰۰۰ جریبو انګړونه او للمي ځمکې جوړې شوي او له هغو اشخاصو څخه چې د مالکیت ادعا لري، سندونه وغوښتل شول.
